વરસાદ !!!
લીલાછમ પાંદડાએ મલકાતાં મલકાતાં
માંડેલી અચરજની વાત
ધરતીને સીમમાં જોઈ એકલી એને
બાઝી પડ્યો વરસાદ
પહેલી ટપાલ જેમ આવેલા વાયરાએ
ઘાસના કાનમાં દીધી કઈ ફૂંક
ધરતી તો સાંભળતા સાંભળે એ પહેલા
કોયલના કંઠમાંથી નીકળી ગઈ કુક
આઠ આઠ મહિને પણ આભને ઓચિંતી
ધરતીની આવી ગઈ યાદ ...
ડુંગરાઓ ચુપચાપ સ્નાન કરે જોઈને
નદીઓ પણ દોડી ગઈ દરિયાની પાસે
એવામાં આભ જરા નીચે ઝૂક્યું ને
પછી ધરતીને ચૂમી લીધી એક શ્વાશે
ધરતીને નારઓ ફૂટશેના વાવડથી
આભલામાં જાગ્યો ઉન્માદ.....
No comments:
Post a Comment